上水：行人路上蓋滿枯葉礙去水
行人路上蓋積垃圾，居民擔心去水渠阻塞影響去水！居於上水天平邨的陳女士指出，連接天朗樓與屋邨商場的行人路上蓋積滿枯葉，個多月來一直無人清理，擔心影響去水渠造成水浸，「啲枯葉堆咗喺度個幾月，同管理處反映過好多次但都係冇人理，落雨實會水浸！」
管業處稱上月曾清理
天平邨管業處發言人稱，接獲居民意見後，已即時安排搭建高台架協助清理工作，並已於四月中完成有關清潔工作。管業處又將於該行人路上蓋位置安裝平行防墮鋼索裝置，以便日後安排清潔工作。有關工程已入則房屋署獨立審查組，現正進行審批。
「我哋四月尾去睇都仲見到啲枯葉堆晒喺度，只係掃埋咗一堆冇清走，仲有依家先安裝防墮鋼索，咁以前做清潔嘅工人咪好危險？」當區區議員柯倩儀批評管理公司未有妥善管理屋邨環境，影響屋邨環境衞生，並盡快完成防墮鋼索確保工人安全。