風水輪流轉，呢句說話真係冇講錯，睇吓澳門咪知囉。近年賭業興旺，財源廣進，澳門表面上係幾風光嘅，可惜表面風光掩蓋唔到裏面嘅污糟，家陣內地加強反腐，劍指澳門，局面開始改變，隨着牛鬼蛇神聞風而遁，賭場風光不再，呢個梳打埠睇怕開始無運行咯。
即係咁，喺內地反腐風暴之下，烏煙瘴氣嘅澳門首當其衝，近日傳出中國銀聯為打擊洗黑錢活動，有意收緊賭場非法碌卡行為，導致賭業風聲鶴唳。而本報得到嘅可靠消息更指出，有關措施最快可能七月一日開始實施，屆時澳門賭場範圍內嘅銀聯終端機將會統統消失。雖然有澳門立法會議員認為此舉係掩耳盜鈴，唔排除有人透過賭場附近嘅商舖碌卡購物，再套取現金賭博，但無論點都好，銀聯終端機絕迹賭場，起碼可以傳達反腐訊息。
係人都知，為逃避內地外匯管制，澳門賭場容許內地豪客非法碌卡嘅情況愈來愈普遍，舊年透過銀聯卡流入賭場嘅非法資金，達到近五百億港元，問題不斷惡化，當局想唔做嘢都唔得喇。
嗱，除咗銀聯卡採取措施防止洗黑錢，當局亦正研究縮短持內地護照過境者嘅留澳時間，據講可能將現時嘅七天逗留期，縮短至三至五天，呢項措施對澳門賭場同樣有好大影響。近日中央電視台踢爆，珠海及深圳多間旅行社代辦假簽注，供未有港澳簽注者前往澳門，呢班人十居其九去賭博，只要當局杜絕假簽注，加上收緊賭場非法碌卡及縮短旅客逗留時間，訪澳內地客勢必進一步減少，賭場想唔拍烏蠅都幾難。
風水佬呃你十年八年，內地反腐對澳門賭業嘅影響即時可見。由於市場憂慮澳門「水源」枯竭，濠賭股盈利前景被睇淡，股價跌到一仆一碌，其中呂志和家族持有嘅銀河娛樂最傷，日前更遭基金大洗倉，累計身家自高位蒸發約六百億元，問你怕未。
老實講吖，澳門藏污納垢，淪為內地貪官洗錢天堂，一早就要整頓喇。不過咁，五十步唔好笑一百步，香港亦唔好得去邊，經過貪曾七年之禍，官商勾結愈演愈烈，多名高官捲入貪腐醜聞，搞到廉潔指數每況愈下，澳門要反腐，香港更加唔可以例外喇。呢，隨着華潤集團董事長宋林貪腐醜聞被揭發，中紀委決定徹查香港五大央企，呢啲咪就係反腐風暴吹到嚟嘅證明囉。
正如毛伯伯話齋，掃帚不到，灰塵照例不會自己跑掉。港澳回歸後各有各亂，一個外面污糟，裏面亦污糟，一個金玉其外，敗絮其中，再唔整頓嘅話，一國兩制招牌遲早不保嘅咋！