不看文件 不做功課 不發言
話說有關委員會當中有幾名成員都係富二代，幾乎每次開會都係奉行「三不政策」。如果事前唔睇文件同備課，開會又可以講到啲咩吖，莫非打天才波？其中一位富二代嘅父親都係政界人士，呢位富二代一係唔出聲，一出聲就語出驚人，曾就穩定樓市雙辣招政策同父親立場對着幹，有人聽到後都陰陰嘴笑。
而另一位開會時鮮有發言嘅商界富二代，講得最多嘢嘅就係喺第一次開會，用咗半個鐘嚟自我介紹，但就唔係介紹自己做過啲咩公職、有咩專業背景，而係不斷吹噓自己啲生意，真係聽到大家恰晒眼瞓。委員會成員質素搞成咁，啲會開咗等於冇開，唔怪得政府推出嘅政策成日畀人批評啦，負責委任名單嘅局長真係要好好反省。