政情：氣候博物館展「詩」家珍藏
極地探險家李樂詩（Rebecca）四出奔走廿幾年，其「心血結晶」氣候變化博物館去年底成功落戶中文大學，展出佢十八次遠征南、北極嘅珍貴資料。Rebecca當然唔會畀個展覽停啦，於是趁博物館成立一周年換吓主題，新增一啲最近搵番出嚟嘅探險資料同市民分享。不過，公職多多嘅Rebecca要喺百忙中抽空執屋都唔易，所以博物館嘅更新進度好視乎佢執屋快唔快喇！
Rebecca尋日以香港童軍總會青少年活動委員會副主席身份出席童軍活動，仲罕有咁穿上整套童軍制服示人添。佢笑言，多年來嘅探險珍藏四散喺佢屋企及香港專業教育學院（IVE）柴灣分校辦公室，要經常「兩頭騰」整理。佢希望透過今次大執屋，將所有珍藏一併送交博物館後，等屋企騰空多啲位置同企理四正啲喎。
咁博物館豈不是變成佢嘅私人貨倉？不過，屋企整齊啲，又唔使怕珍藏被誤當垃圾丟到堆填區，市民又有眼福，都算係一舉三得嘅。