政情：田少 「朋友」裸聊騙財
「裸聊陷阱」席捲全球，早前有機構就指單計香港，可能已經有成幾百人中過招，只係好多人冇報警啫。本身係IT專家嘅雲端與流動運算專業人士協會會長陳家豪（Emil）透露，裸聊騙徒其中一種犯案手法，就係狂Add一啲政商界名人做網上朋友，將自己裝扮成有名有姓嘅上流社會分子，其中佢就遇過一位自稱係行政會議成員陳智思同立法會議員田北俊（田少）嘅「朋友」，聲稱「性飢渴」撩佢進行「Cyber Sex（虛擬性愛）」，最後佢冇上當，但點知真係有朋友中咗招！
IT專家好友曾上當
Emil日前出席一個IT界活動時自爆，早喺兩年前、即「裸聊陷阱」仍未廣為市民認識時，佢忽然收到一位「靚女」喺網上搭訕，對方喺社交網站上載咗一張瞇晒眼、張晒嘴嘅「大頭相」，意態撩人，聲稱好仰慕Emil呢位名人，想同佢交過朋友喎。呢位「靚女」又自稱畢業於名牌大學，任職於某大公司，而且喺短短幾個月內，狂Add咗大批政商界名人做朋友，當中包括及陳智思同田北俊等，企圖將自己裝扮成「名人圈」嘅一分子。
Emil喺IT界同網上世界打滾咁耐，一睇就知對方有問題，但基於好奇心，佢決定繼續同對方交談，睇吓呢位「靚女」究竟想點。果然過咗冇耐，「靚女」向佢大膽直言「性飢渴」，要求Emil透過即時視頻同佢「Cyber Sex」慰藉吓喎。講到咁白，Emil當然即時煞停，以後都冇再同呢位「靚女」交往喇。
過咗三個星期之後，Emil嘅一位男性好友，就喺社交網站自爆墮入裸聊陷阱，被對方拍下「私處」勒索，最後惟有厚住面皮報警處理，真係千年道行一朝喪！
除咗假扮名人嘅朋友行騙，有網上騙徒更直接變身「名人」，求其喺網上搵張某位名人嘅相片做個人相，再Add其他名人做網友，城中某位知名嘅政商界兼娛樂界名人二代，就曾經畀人冒認過，成功騙取咗唔少其他名人嘅個人資料。其後有人直接打畀有關名人二代求證，對方就話「我從來都唔玩facebook嘅！」眾人先知道受騙。