中環出更：視察投注措施不鬆容
沙田馬場尋日有賽事，城中名人及馬主入場玩係輕鬆平常嘅事。不過，卓妮見到香港專業及資深行政人員協會創會會長容永祺（Samuel）、博愛醫院前主席伍翠瑤（Jennifer）及香港青年聯會前主席葉振都等一行十幾人，好似鴨仔團咁急步行過，唔知做咩呢？
原來Jennifer係博彩及獎券事務委員會新成員，身為委員會主席嘅Samuel專登安排幾個委員一齊去視察馬會喺防止青少年賭博方面嘅安排，跟住仲拉大隊去沙田市區睇埋馬會場外投注站。
防止青少賭博
Samuel話，佢哋今次主要視察馬場內小朋友區域係咪同投注區嚴格分開，以及監察每場賽事嘅管理系統係咪公正。至於去沙田市區內嘅場外投注站，主要係視察防止十八歲以下青少年投注方面係咪做得足夠。雖然最後發現仲有改善空間，但大致都幾滿意。
Jennifer就話，佢哋特登揀賽馬日入場，咁先至可以睇到實際情況。佢又話，委員會嘅職能包括向民政事務局局長提出係咪畀馬會續牌嘅建議，梗要審慎認真啦！
講番馬場，香港鐘表業總會前主席梁青華（華哥）一家都有入場。華哥大仔梁仲元（Raymond）身兼總會人才培訓部部長。Raymond話，業界普遍缺乏維修師傅，原因係入職培訓唔夠，入行新血不足，令檢查及維修時間拖長咗。最近總會專程請一位瑞士鐘錶老師傅來港兩個月，開班授課兼交流最新維修技術，希望有助改善情況。
卓妮