政情：跟風「登台」 區諾軒執輸行頭
南區海怡西未有因為區議會補選戰落幕而變得平靜，反而愈嚟愈熱鬧，皆因傳聞海怡西商場嘅大業主台灣太電集團有意將商場改為特賣場，居民恐怕引來大批內地客。各黨派見到呢舊肥豬肉梗係唔會放過啦。
泛民率先搞遊行成功博出位，新當選區議員嘅新民黨陳家珮（Judy）輸咗第一仗，嗱嗱聲出招直飛台灣同大業主會面，算係扳回一城。估唔到民主黨仲唔死心，尋日竟然急派隔籬利東區議員區諾軒去埋台灣見業主，佢仲不停喺社交網站「打卡」。
全程狂打卡
俗語有話「執輸行頭，慘過敗家」，區諾軒尋日全程未停過喺Facebook更新狀況，又不時上載自己身在太電總部嘅相片，連同佢會面嘅太電副董事長鄭超群及總裁李超群卡片都擺埋上網。
話時話，Judy本來話尋日會再同業主會面，唔知呢兩位港男港女，會唔會喺台北撞到呢？