政情：中環出更：兩爸佳節謝母恩
聽日就係母親節，正所謂「養兒方知父母恩」，升呢做爸爸嘅男士感受最深。卓妮尋日就先後撞到馬會大董葉澍堃長子葉瀚林（Hiram）同埋中華廠商聯合會會董陳家偉（Calvin）行街買嘢。兩位已為人父嘅大男人，一個買禮物，一個買餸學做「住家男」，無非係為氹老婆及媽媽開心。
尋日食晏時間，Hiram喺中環一間女士飾物店內出現，期間同女店員有傾有講，冇耐就拍板買咗嘢，然後拎住個大袋離去。
葉瀚林 陳家偉獻心意
原來Hiram買咗個心口針送畀媽媽，上個月幫佢添咗個仔嘅太太就獲贈銀包。佢話升呢做爸爸後，先知湊BB咁辛苦，所以趁母親節向家中兩名偉大母親致敬。
講起個BB仔，Hiram話，爺爺已經幫孫仔改名「浩林」，兩父子個名併埋就係「浩瀚」，橫跨兩代都咁有意思。至於母親節正日有咩活動，Hiram就話，太太產後仲未復元番晒，所以都係留喺屋企慶祝喇！
之後，卓妮又撞見育有一對龍鳳胎嘅Calvin喺一間超市現身，見佢一個大男人推住購物車好專心買餸，好快就掃咗西班牙火腿、法國有機生菜同壽司等食品，然後急急腳畀錢離去。Calvin話，佢啱啱開完會，買完餸後打算趕返屋企，提早煮餐好嘅孝敬媽媽同老婆大人，皆因佢今日要飛上海公幹。
咪以為Calvin牛高馬大實唔識下廚，其實佢留學美國時鍾意買餸返屋企煮，仲利用當地潮興嘅一隻辣椒醬自製L.A.式日本菜，大讚呢隻辣椒醬好惹味，近年去美國都會一箱箱咁買番嚟慢慢歎。睇嚟Calvin媽媽同太太有口福喇！
卓妮