風雨來臨蟻上樹 濠江船沉鼠先逃

點解澳門賭股近排一瀉再瀉？原因好簡單，主要係內地全力反腐，貪官唔敢上門，澳門賭場少咗呢班豪客咯喎，梗係冇運行喇；加上五一長假期訪澳旅客減少、個人遊訪澳簽證將會收緊、銀聯卡加強措施防洗黑錢，同埋傳聞有大客捲款潛逃，各種負面消息一齊爆發，濠賭股想唔腳軟都唔得喇。

所以話，澳門金玉其外，敗絮其中，一啲都冇講錯。表面上博彩業發達，財源廣進，實際上藏污納垢，淪為內地貪官嘅洗錢天堂。有人計過數，回歸以來貪官透過賭場及購買鑽石、珠寶、物業等方式清洗嘅黑錢估計超過十萬億港元，淨係透過銀聯卡非法流入賭場嘅資金一年就高達五百億港元，唔怪得澳門被稱為「超級洗衣店」喇。

最令人質疑嘅係，澳門回歸後開放賭權，法例寫明只發三個賭牌，結果竟然變成六個半，除咗何鴻燊家族同其中三個半賭牌有關，美資財團更加係大贏家。淨係三家美資賭牌公司咋，過去五年就從澳門搬走八百億港元，有人話澳門博彩業根本就係為美資財團而設，真係冇誇張。當然喇，澳門之所以搞成咁，同內地高官絕對有關，佢哋其身不正，包庇貪腐，甚至上下其手，同流合污，卒之發生歐文龍世紀巨貪案，該案除咗涉及劉鑾雄及羅傑承等多名港澳政商名流，而且涉及眾多內地貪官，好多醜聞仲未被踢爆嘅咋。

好彩天地有正氣，隨着內地反腐風暴吹到嚟，澳門風聲鶴唳，超級洗衣店風光不再，睇怕遲早都要執笠咯。唔係講笑，曾經備受投資者追捧嘅濠賭股，近排好似食咗瀉藥咁，跌到阿媽都唔認得，呢啲咪就係不祥之兆囉。正所謂，風雨來臨蟻上樹，大船將沉鼠先逃。嗰啲大鱷見到勢色唔對，聞風而遁，賭股唔跌到四腳朝天至奇喇。嗱，食少多教訓，大家咪諗住撈底吖，反腐風暴方興未艾，澳門可能仲有排黑，賭股博唔過。

正如有人話齋，有咁耐風流，有咁耐折墮。澳門呢個彈丸之地之所以大鱷如雲，龍蛇混雜，皆因博彩業盈利驚人，賭牌就好似會生金蛋嘅肥鵝。可惜今時唔同往日，內地貪官自身難保，個人遊又受到限制，賭場拍晒烏蠅，肥鵝變瘦鵝，澳門想唔折墮都幾難！