政情：陳家珮赴台 搵海怡西商場大業主
海怡西居民擔心海怡西商場變特賣場餘波未了，泛民多個政黨早前組織到海怡西商場和當區名店抗議，質疑當區區議員陳家珮未見蹤影，事隔幾日後，陳家珮（Judy）近日直接遠赴台灣同商場大業主會面，似乎Judy為咗釋除居民疑慮，真係可以去到好盡。
今續爭會面 促對方表態
Judy尋日喺社交網站公布已經抵達台灣，表達居民對海怡西商場不要特賣場嘅訊息，但似乎都經過少少波折。佢話到達大業主位於當地嘅公司時，起初一時話不方便，一時又話公司冇人，最後足足等咗三個小時，終獲大業主、該公司總裁李超群接見，當時佢即時轉交超過一千名居民簽名、商戶聯署及報章廣告等表達不滿，之不過雙方會面接近一小時，業主並未作出任何承諾，就話要趕去下一場會議，Judy話會爭取今日繼續會面，並會強烈要求業主作出明確表態。
Judy又喺社交網站交代會上提出嘅四個訴求，包括海怡半島嘅交通、商場面積等客觀因素，根本不適合做特賣場等。至於此事今日有否再有進展，大家就要拭目以待。