中環出更：馮國經睇腦內科醫腳患
近排天氣潮濕多雨，特別容易令人周身唔舒服。尋日下午大約四點鐘，卓妮就撞見利豐集團榮譽主席馮國經（Victor）現身名醫雲集嘅中環中建大廈，佢隻身等電梯，然後上到一間腦內科專科診所，期間逗留大約四十五分鐘後離開。Victor有咩事要睇腦內科咁緊要呢？原來佢只係睇腳患，仲笑笑口話冇咩嘢，大家唔使擔心喇！
Victor一入到診所就行入去登記，然後按護士指示除低西裝度高磅重，跟住坐埋一邊等候，一邊篤部智能手機消磨時間。等咗大約十分鐘，就輪到佢入病房睇醫生，仲睇足廿五分鐘後至出番嚟。睇嚟呢位城中知名嘅腦神經科專科醫生都睇得好詳細，亦好盡責咁同佢解釋病情。
年近七旬 步履頗快
Victor離開診所時，卓妮上前問候佢身體有咩唔舒服，點解要睇腦內科？Victor一派輕鬆話，佢嚟睇左腳咋，因為年紀大，退化，強調冇乜嘢大礙，就算做運動都冇問題，只要慢慢嚟就得喇！咁究竟係乜嘢病呢？佢好客氣咁答：「私人嘢，唔好講喇！」然後講拜拜離去。卓妮見佢離開時，行路活動自如，步履頗快，望落又唔係認真有咩大問題喎。
可能大家同卓妮一樣，唔明點解腳患要睇腦內科。卓妮請教過高人，其實腦神經對人體嘅影響十分廣泛，咪話腳患，連吞嘢落肚有困難都同腦神經有關。話時話，Victor今年已六十九歲，真係要好好保養身體。
卓妮