瞞得就瞞，騙得就騙，已經係官場常態。高鐵延工係咁，港鐵事故係咁，涉及三十九條人命嘅南丫海難慘劇都係咁，明明海事處責無旁貸，但邊個官員要負責，具體錯失係乜嘢，當局至今遮遮掩掩，企圖蒙混過關。港府官官相護，掩蓋真相，有責不問，咁點對得住亡魂先，點對得住家屬先？
海難事故發生後，港府話就話調查，實際上係拖字訣，先用幾個月整咗一個獨立專家調查報告，跟住又用十個月時間對海事處進行內部紀律調查，好唔容易完成報告，家屬以為真相大白喇，沉冤得雪喇，點不知港府一個屈尾十，以所謂刑事調查同官員私隱為由，拒絕公布整份長達四百頁嘅報告，僅公布咗三十頁嘅內容摘要，連失職官員嘅身份都諱莫如深，如果當局唔係心中有鬼，又使乜遮遮掩掩吖？
公道自在人心，「東方報業民意調查」顯示，三成六受訪者批評遮掩漏洞錯誤，一錯再錯；三成一認為欠死者一個公道；兩成五直斥當局交白卷，查完等於無查。對於當局以刑事調查為由拒絕公開整份報告，三成四受訪者認為涉官官相護；三成一直指披露太少，不合情理；兩成六批評找藉口隱瞞真相。立法會議員亦狠批，涉案人員目前仍未被檢控，當局呢個藉口根本唔成立。
不過咁，當局點樣掩蓋真相都好，係冇可能隻手遮天嘅。獨立專家調查報告踢爆，過去二十年間，海事處喺肇事船隻設計、驗收、監管各方面犯下連串錯誤，而海事處處長廖漢波事後一度拒絕道歉，更係眾矢之的。廖漢波即將退休，如果退咗休就唔使追究責任，仲可以咬長糧食到死，咁仲有天理嘅？
睇下人哋南韓吖，歲月號海難發生後，老師內疚自殺，總理辭職問責，南韓人嘅知恥文化實在令人動容，反襯港府官員不知羞恥。事實上，要佢哋開金口講句對唔住都難過登天，遑論問責下台。港府仲話乜嘢官員問責制喎，不如正名「官員卸責制」好過。
點解要追究事故責任呢？除咗弄清真相，告慰亡靈，仲有助吸取教訓，防止悲劇重演。可惜吖，當局連交代調查結果都不情不願，吞吞吐吐，一啲誠意都無。難怪三成七受訪者認為調查報告無用，無因此吸取教訓；另三成七直指報告只係表面工夫，無實質幫助；一成九批評只係一場騷。
點講都好，三十九條人命絕對唔能夠就咁冇咗，當局繼續官官相護，唔好話家屬同全港市民不答應，陰間嘅死難者都唔會放過你哋！