本報早前率先報道，港府有意就「雙倍印花稅」（DSD）嘅樓換樓限期作出讓步，以換取立法會盡快通過有關嘅樓市「辣招」草案，考慮方向包括將樓花買家須於六個月內出售舊物業嘅規定，由原定嘅完成樓花交易起計算，改為完成現樓交收後先「起錶」，以免啲換樓客被迫以賤價急售物業及暫時租樓住避稅。不過當局經深入研究後，發現樓花交易原來有好多花款，好難喺法律上寫清楚乜嘢叫做完成現樓交收，令政府想讓步都有難度。
立法會DSD草案委員會今日再次開會，重點討論建築界議員謝偉銓（Tony）提出嘅放寬樓花換樓限期建議。據悉當局其實好想接納Tony嘅建議，讓並非買嚟炒嘅樓花買家豁免繳交DSD，但問題係有關樓花嘅法律同交易程序頗為複雜，尤其係喺去年四月廿八日或之前進行嘅樓花交易，當時《一手住宅物業銷售條例》仲未生效，未有法例規範賣方須於指明時限內以書面通知買家完成交易，喺當日之後進行嘅樓花交易，亦有「預售樓花同意方案」與「非同意方案」之分，一旦相關修訂寫得唔夠清晰，涵蓋唔到所有樓花交易情況，好易會畀發展商同炒家乘虛而入，合法避稅。當局重申議員必須提出到一個清晰、公平、而又唔會產生其他漏洞嘅讓步方案，政府先至會say yes！