中環出更：黃進達暫無意復辦菲國團
馬航空難、沙巴綁架案、南韓海難等接連發生，令唔少港人覺得留喺香港度假先至最安全。其中剛就人質事件公開道歉嘅菲律賓，日前又發生有華人被槍殺意外。康泰旅行社董事總經理黃進達（Jason）就坦言，有需要觀察多一段時間確保當地旅遊安全，暫未考慮復辦菲律賓旅行團。喺另一邊廂，上月發生嚴重雪崩嘅珠穆朗瑪峰，亦令唔少熱愛挑戰高峰嘅香港名人卻步，暫時冇計險劃冒險登峰。
確保團友100%安全先
卓妮尋日喺馬場撞到Jason，自然要問吓佢有冇計劃復辦菲律賓團，佢強調仲需要時間觀察吓，確保團友百分百安全先會復辦，加上以往報團遊菲律賓嘅港人其實一向唔多，大部分港人去玩，都係自由行去宿霧度假同潛水。對於港府調低針對菲律賓嘅旅遊警示，Jason話無論係邊種顏色嘅旅遊警示，只要市民夠膽去，總可買到旅遊保險，只係受保範圍會因應發出警示嘅原因而有所不同，有意成行嘅市民事前一定要問清楚。
卓妮之後又見到鍾情攀山滑雪嘅利希慎家族後人兼馬會大董利子厚，談及上月嘅珠峰致命大雪崩，佢強調自己安全至上，尤其係登珠峰呢啲咁艱難嘅旅程，一定要再操弗啲、累積更多攀山經驗先敢去。至於本港行山嘅好去處，佢就推介大嶼山同山頂附近一帶，佢好希望大嶼山嘅自然環境得到保留同保育。
周松崗拒評高鐵風波
同樣熱愛外遊同行山嘅另一馬會大董陳南祿亦所見略同，話珠峰係啲專業攀山人士先應付到，佢自己就冇諗過去，並提醒大家但凡係雪山都唔易行，千祈唔可以睇少。期間卓妮仲遇到港鐵前行政總裁周松崗，高鐵工程延誤風波鬧到熱烘烘，梗係要問問佢點睇啦，不過佢就斬釘截鐵咁話，自己不在其位、不謀其政，唔會評論任何有關港鐵嘅事喇。
卓妮