「畀條路行吓呀！唔該！」店舖阻街講呢句，拖篋旅客阻街也可以講呢句，政務司司長搞政改一樣是呢句。
政改無路行，關鍵是要特首有普選的認受性，又要限定某些人不當選；即是做建制的有條康莊大道，做泛民的要走死胡同，玩政治邊有咁理想！「畀條路行吓呀！唔該！」泛民一樣可以講呢句。特區政改困局，司長如果唔畀條路泛民行吓，泛民態度，自不然是大家都唔好行。
建制派最近建議的方案，提委會增至千六人，要提名需八分一提委支持，要成為候選人需過半數提委支持。即是入閘要八分一，篩選出閘要二分一，篩選採全票制，即是獲提名的如果有四人，每個提委手中便有四票，每票限投一人，可支持全數四人，當然亦可少投一票，這一票不投誰大家心照，真的不用阿爺教。
八分一入閘提名，泛民在提委湊得出，但二分一出閘候選，泛民斷無可能爭取得到；司長自覺無路行，大前提是政改有無考慮畀條路泛民行吓。
建制派做得盡，司長如果照跟，等於絕泛民去路，到頭來大家都唔使行。或者說特區頭一遭普選特首，當然不想選個泛民出來；但搞政治，重要的是還有無希望，路未通也起碼有個路口。二分一出閘候選，對泛民來說就是死胡同，就算調低門檻至四分一，泛民在一、兩屆之內也湊不齊此數，但未來有機會，感覺上未至於絕路。
政改路好比去西天取經，敢問路在何方？特首不只建制想做，泛民也想做，不就是愛國愛港的體認，阿爺應該樂見。路是人行出來的，政改要有路行，不讓泛民當選之餘，也不能讓泛民絕望。