政情：公民講場：阿基開會喊被「污辱」

深水埗區議會尋日討論石硤尾一塊綠化地改做住宅用途，結果惹來環保團體同居民到場抗議，身兼立法會議員嘅民協馮檢基（阿基）就選擇企喺環團一邊，同前民協區議員甄啟榮互相駁火，期間充滿火藥味，但亦不乏笑料。阿基話發展商應該負責環評報告，甄啟榮隨即回應一句：「講得咁口響，幾時同長毛一齊行出議會呀？」唔知點解，阿基即時向區議會主席投訴有人「污辱」佢，搞到在場人士都Ｏ晒嘴。無啦啦被批評污辱人，甄啟榮當然無奈啦，唯有叫大家翻聽錄音幫手評理。既然去到「污辱」咁嚴重，點解阿基唔報警呢？