政情：今日你上鏡：估佢唔到「錦」夾Band

負責處理俗稱網絡廿三條嘅《版權條例》、經常被網民改圖惡搞成「小丑」嘅知識產權署署長張錦輝（Peter）（圖右），平時到立法會開會都好嚴肅，但原來佢都有輕鬆一面。話說上周五佢就同一班志同道合好友喺一個有關「世界知識產權日」嘅音樂會上夾Band獻技，同台仲有行政會議成員廖長城，呢個組合真係估佢唔到，唔通二人平時有夾Band習慣？將近六十歲嘅Peter，五月中正式退休前休假，可能因為咁，當日佢表現特別興奮，事後仲同平時喺議事堂針鋒相對嘅資訊科技界立法會議員莫乃光搭晒膊頭合照。再次證明，呢個世界無永遠嘅敵人。