立法會審議財政預算案「拉布」戰今日開始，主席曾鈺成早前裁定，容許議員提出合共一千一百九十二項修訂，初步估計表決都最少三十個鐘。政府似乎好驚「拉布」拉出禍，財政司司長曾俊華（鬍鬚曾）早前去信曾主席，要求佢盡量喺五月中前通過《撥款條例草案》，否則公共服務會大受影響，隨時冇錢發放畀綜援戶，甚至冇人收垃圾。講到咁嚴重，曾主席只係搵秘書代筆回信就算，可能知道鬍鬚曾講嘢係「狼來了」靠嚇居多。
鬍鬚曾話，驚立法會未能及時通過《撥款條例草案》，有必要重申草案重要性。佢列舉多項公共開支「靠嚇」，話如果限時前過唔到，唔止醫療、教育受影響，連維持治安、修路同掃街都未必有人手。而且臨時撥款只係夠政府用到五月底，計埋立法程序同授權嘅安排，鬍鬚曾「建議」立法會最好喺五月中前通過草案喎。
面對鬍鬚曾「發號司令」，曾主席冇乜大反應，反而叫秘書代筆回信，擺明冷處理。不過，今次「拉布」戰對泛民都未必有著數，因為支聯會主席李卓人暫定喺五月十四號動議「平反六四」議案，如果屆時仍然「拉布」，咁動議亦要押後處理喇。