政情：立會檔案庫防火唔怕潮
訂立《檔案法》對地方政府保留珍貴檔案至為重要，但港府檔案管理混亂，立法程序等了又等都未見進展，令包括「貪曾」前特首曾蔭權爵士部分貪腐證據，都懷疑無聲無色被銷毀。相反，立法會檔案就公開、透明得多，不但唔怕公眾上門查閱，最近仲調動資源將立法會百年歷史上載網頁。更犀利嘅係，原來立法會大樓內有間可防火四小時嘅檔案庫，確保一切重要資料受到保護。
室溫十八度 設空氣過濾
眾所周知，立法會設有停車場秘道方便議員必要時「走佬」，原來立法會圖書館亦潛藏咗個檔案庫。據悉，檔案庫保存珍貴資料嘅規格跟足國際標準，單係檔案庫大門就足以抵抗大火四小時，室內氣溫長期維持攝氏十八度，自設空氣過濾系統，室內採用冇紫外光嘅LED燈，防止紙質隨時間變黃、變脆。咁安全，如果將來議員有需要「避難」，秘書長陳維安（Kenneth）可以帶議員去檔案庫暫避喎！
立法會資訊科技部尋日仲向傳媒簡介改版後嘅立法會網站，公眾不但可以更方便重溫會議，搜索資料亦快捷好多。好似以搜尋有關變性人W小姐案件為例，只要鍵入「W小姐」關鍵字，即會彈出主理《2014年婚姻（修訂）條例草案》嘅委員會及相關文件，毋須吓吓輸入草案名稱咁刁鑽。市民要搜尋議員就議題發表過咩意見都一眼睇晒，議員想反口走數都難喇。
研究搜尋引擎「排頭位」
立法會仲逐步公開立法會電子檔案，好似議員資料庫可以追溯到一八四三年第一屆立法局成員名單，原來當年四人立法局包括香港第一任總督砵甸乍爵士。至於出任立法會議員多年嘅劉皇發（發叔），翻查資料庫就知道佢自八五年參選臨時區域議局發迹至今。
除咗議員資料，就連一八五八年後立法局會議逐字記錄亦全部上載網站，Kenneth坦言，由於檔案年代久遠，加上古時英官寫英文比較有個性，部分字眼意思都係靠估，但職員一定會註明邊個字靠估嘅。立法會仲研發搜尋引擎「上位」方法，確保網民輸入同立法會事宜相關字眼，立法會相關網址可以排頭位顯示，唔知係咪想提高點擊率呢？