中環出更：林偉強唔參加坪洲補選
離島區議會坪洲及喜靈洲選區議員安慶英本月中因病辭世，按照現行法例，政府會於六個月內因議席懸空，舉行補選。咁啱我哋日前接到有市民報稱，指早前因坪洲鄉事委員會修章而被踢出鄉委會嘅鄉議局副主席林偉強，意圖借殼翻生，參加今次坪洲補選，循呢個途徑返鄉委會喎。不過，林偉強尋日被問到參選一事時，就誓神劈願咁話絕對無意參加今次補選，莫非佢另有打算？
林偉強仲話，平日鄉議局及其餘民生工作已經要用好多時間處理，加埋佢有啲商務要做，所以唔會參選喎。
「好多嘢忙緊」
其實林偉強本身係坪洲人，又曾經擔任坪洲鄉委會主席，無端端被踢出局，大家梗係估佢會唔會計劃起死回生啦，點知佢話唔選。咁又係嘅，如果鄉議局副主席都選輸嘅話，好難面對啲鄉親父老嘛。所以林偉強今次唔選，究竟係驚輸議席輸埋面子，抑或真係忙到選唔到呢？咁就佢自己先至知道喇！
卓妮