綠色先鋒：溝出清潔劑
廢油重生，去污話咁易！炸薯條、炸雞翼香脆美味，食油功不可沒。惟食油功成身退後，變成神憎鬼厭的千年油或廚餘，「一倒了之」只會淤塞渠道，並污染水源，成為生態殺手。有食肆化身環保巫師，唸句綠色咒語：「咕嚕咕嚕，Green﹗」將廢油改邪歸正，左添右加，溝溝溝……炮製成去污力強的環保清潔劑，有助減低對環境的污染，更可保護雙手肌膚。廚餘升級再造，拯救地球！
維真戴上手套及眼罩，穿上保護衣物及圍裙，手執「架生」，整理枱上的瓶瓶罐罐，再仔細量度配料，倒水撒料，口中唸唸有詞，講解環保清潔劑的製作步驟，不消一會，製成品即成。功架十足、「溝嚟溝去」的她指出，廚餘問題在港逐漸得到關注，食肆及家庭產生的大量廢油卻少人正視，「有啲食肆會將廢油倒去坑渠，條渠好易塞，到時就要用好多化學物質搞番掂。而且啲廢油排出海中，係冇咁易分解到，會污染水源，啲水又會臭，亦會令魚呼吸唔到，嚴重影響生態。」
廢油再造 一周可用
於是她研製環保清潔劑配方，到不同小店回收廢油升級再造。配方材料簡單，包括回收油、氫氧化鉀、水及果皮等廚餘。首先分段將氫氧化鉀倒入水中，持續攪拌，化學作用下，溫度會持續上升，待溫度升至攝氏八十至九十度後，擺在通風位置冷卻至五十度，製成鹼液。
其後，加熱廢油，倒入鹼液，以棒形攪拌器快速攪勻三至六分鐘直至稠狀，並加入小量果皮。最後，將半製成品放入保溫袋覆蓋厚毛巾，放置二十四至四十八小時便會變成半透明的軟膏，放置一星期便可調開使用。
天后一間餐廳亦響應使用環保清潔劑，經理Mona更自製環保酵素，作為清潔碗碟及洗地之用，「我哋舖頭剩低好多檸檬皮、橙皮同菠蘿皮咁，呢啲果皮有香味，適合用嚟做清潔劑，加入糖同水發酵，三個月後就可以用。」Mona指，她所使用的糖亦是客人餘下的，將環保進行到底，「環保清潔劑去污力夠強，唔使沖咁多次水，慳水之餘，對皮膚刺激都可以減少。」
環保慳錢多用途 食肆讚好
香港營商成本高，小店經營困難，不少食肆要度橋左慳右慳，Mona指自製環保清潔劑既環保又慳錢，有助減低成本。
「我哋經營食肆好多使費，又要買清潔精、洗地水，淨係買清潔用品都唔平。」Mona坦言，最初自製環保清潔劑，是為了節省成本，環保清潔劑用途廣泛，可清潔碗碟外，又可以洗地抹枱，「買少咗清潔用品，慳番唔少！」
她又指，餐廳選用氣炸鍋及光波爐，以減少製造廢油，「呢類新式嘅煮食爐具唔使用油，都可以整到啲食物脆口，健康啲又少咗廢油。」她又教路，在冬季，食肆可使用蠟燭，減少開燈，營造浪漫氣氛外，又能降低用電量；在夏季，開一把風扇則可令室內較通風，亦不會感到侷促炎熱。
圖：蘇偉明／文：溫盈盈