真係唔到你唔信邪！東鐵周日早晨，大批乘客坐上了從系統消失的火車，怒吼：港鐵，壞夠未？
鎖你！Sir，東鐵周一又晨咁早出現訊號故障，全線列車一度暫停服務，話就話列車服務只受阻七至八分鐘，然有乘客投訴話至少遲咗半個鐘才到站。老朽睇東網新聞台第一時間直擊，見到有個乘客谷爆，除了嗌冇眼睇，又狂炳港鐵又壞，離譜！高層要全部辭職！
小市民嘅心聲，確實可以理解，有乜理由周日壞完，啲高層話會通宵檢驗，查出事故原因，誰知嗰頭噏完，呢頭又壞車，你叫市民點接受年年賺大錢年年票價可加不減嘅港鐵服務呢？睇東網列咗個簡表，單係今個月，港鐵已發生至少五單事故，你話乘客唔谷爆就真係有鬼咯！
港鐵署理基建總經理黃永健強調，東鐵線周日出現數據傳送系統故障後，已更換懷疑故障的路由器及周邊設備，已聯絡澳洲方面的系統供應商，聲言港鐵一直投放大量資源在維修及更新方面，故看不到今次事故與機件老化有關。
阿哥，港產官僚出錯，只會扮一臉驚訝，至於港鐵的高層們，卻教吾人看到「莫非定律」──天下事莫非倒楣事，而「莫非衍生定律」也十分適合於港鐵──解決任何問題，一定會造出新的問題，這就難怪港鐵工程師指故障屬不幸！
走筆至此，老朽忽地想起《金瓶梅》六十一回有諷刺趙太醫常斷錯症，瘀事百出；之不過，這位庸醫還懂以打油詩自嘲：我做太醫姓趙，門前常有人叫。只會賣杖搖鈴，那有真材實料。行醫不按良方，看脈全憑嘴調……今港鐵高層，對列車頻頻事故，除了懷疑還是懷疑，與趙太醫斷症的一味靠估，相差無幾；看來市民長期搭港鐵，必練就忍者神功，若練唔成或走火入魔，則屬不幸！