政情：公民講場：四鐵爆阿炳仲大鑊

運輸及房屋局局長張炳良喺最近短短兩、三個禮拜內接連爆大鑊，頻密程度拍得住外號「每周一鑊」嘅食物及衞生局前局長周一嶽。首先係高鐵工程爆出嚴重延誤同超支醜聞，張炳良聲稱自己事前唔知情，對事件深表震驚。之後又輪到南丫海難調查報告風波，政府以為免影響刑事檢控程序為由，拒絕全面公開報告內容同失職官員名單，死難者家屬狠批張炳良隱瞞護短。到最近兩日就仲大鑊，港鐵東鐵線、西鐵線同觀塘線接連出現延誤事故，張炳良再震驚多十次都甩唔到身。今次都唔知究竟係佢本人當黑，定係全港市民當災！