政情：潘佩璆出山 幫工記答英文提問
本身係醫生嘅工聯會前立法會議員潘佩璆早前患上重病，要做手術同成日出入醫院接受療程，淡出咗政圈一段時間。尋日工聯會發表佢哋嘅二○一七年特首普選方案，潘佩璆罕有現身，但其實佢並唔係工聯會政制專責小組成員。原來佢今次重出江湖，主要係幫工記手回應傳媒嘅英文提問，認真唔話得。
發表特首普選方案
兩大建制派政團民建聯同工聯會嘅核心成員，大部分嘅英文水平都麻麻，早前民記公布佢哋嘅政改方案時，就派出本身係律師嘅副主席張國鈞專責回應英文提問，而工記尋日就搵咗潘醫生出山幫手。潘醫生喺記者會後向傳媒報喜，指自己已完成晒治療，連藥都唔使食，只需定期覆診同檢驗及聽屋企人話，不時睇中醫調理身體，今個月初佢仲同囝囝、乖孫等三代同堂，去台灣玩咗八日，又浸溫泉又參觀牧場，非常寫意。