政情：李嘉誠感謝《寧養計劃》醫護
李嘉誠基金會○七年起同醫院管理局合作，推行《人間有情 ─ 香港寧養服務計劃》，過去六年多以來，一群醫護人員及服務團隊讓二萬七千名末期癌症病人得到適切支援。為咗向守護天使打打氣，基金會主席李嘉誠上周五於報章刊登公開信，衷心感謝各醫護人員和服務機構團隊無私奉獻，佢仲同寧養服務合作夥伴聚餐，分享助人路上點滴。
李嘉誠話，對於在生命邊緣掙扎嘅病人，寧養工作就如給渴者一杯白開水，平靜、和暖，減輕身心痛楚，咁有意義嘅工作，應該延續下去。佢又希望醫管局繼續支持寧養服務，把支援病人嘅力量發揮到最大。醫管局主席梁智仁感謝李嘉誠對提升香港公立醫療服務嘅貢獻，而寧養服務計劃更造福有需要病人及其家屬。
李嘉誠基金會至今捐資逾一億二千六百萬元，超過廿三萬人次受惠，除咗喺生命邊緣掙扎嘅病人，仲向約二千名兒童及超過一千三百個家庭提供哀傷輔導服務。