中環出更：李大壯：港生冇台生咁激
一場台灣太陽花學運，令唔少本港政商界人士預計，香港嘅「佔領中環」行動會同台灣嘅反服貿運動一樣，搞到一發不可收拾。不過，同時熟悉中港台政經灣事務嘅「香港-台灣商貿合作委員會」（商合會）主席李大壯（大壯）就唔係咁睇，佢指台灣反服貿學生唔使憂未來出路，就算坐完監都可以前程似錦，但香港仲未有類似文化，相信香港學運一定唔會好似台灣咁激。
「怕犯事無人請」
大壯解釋，擁有源遠抗爭文化同歷史嘅台灣，學生可以將搞學運當作「career（事業）」，唔怕被政府打壓同坐監，因為放監後可以帶住呢個光環從政，選立委、選市長、甚至選總統，就算唔想從政改為打工從商，亦總會有一批台灣企業爭住請佢哋。反觀香港雖然擁有思想同言論自由，啲學生嘅思想、立場同言論有幾激都得，但一旦犯咗事留下刑事案底，就好難搵到人請你。佢斷言香港依家嗰批激進大學生同中學生，絕大部分畢業後都會「從良」專心搵工或去外國升學。
大壯昨見記者其實並非想講反服貿，而係想簡介商合會未來一年有咩目標，除喺台灣舉行關於兩地物流、航運同金融發展嘅研討會，亦會爭取開通讓香港航班直飛台北松山機場等。
卓妮