中環出更：版畫美酒拍賣頌親恩
下個月又就到母親節，百行以孝為先，仁愛堂尋日趁呢個機會舉辦「頌親恩、獻關懷」慈善晚會，拍賣多幅版畫連同美酒，善款撥捐「仁愛堂長者愛心卡計劃」，津貼缺乏子女同親人照顧嘅六十五歲或以上長者，享用仁愛堂轄下醫療、膳食及康樂等服務，為獨居長者生活增添暖意。
今次係新任仁愛堂主席吳明珍四月上任以來，第一次搞嘅大型活動。講起活動主題頌親恩，佢甜絲絲咁讚自己囡囡好孝順，每年都會一早留意定啲佢鍾意咩禮物，好似手袋或者手飾咁，然後喺母親節當日送畀佢，所以次次都一定啱晒心水。
幫助獨居長者
吳明珍又透露，今次選擇以拍賣版畫同美酒籌款，主因係「悅心齋」畫廊嘅靚靚董事蕭萍，同今次捐出名酒嘅酒莊老闆係老友，經介紹後覺得今次活動幫到啲獨居長者，好有意義，於是決定一齊參與，最後「悅心齋」一共捐出七幅版畫作慈善拍賣。
新主席首次搞活動，一班副主席同總理當然一早到場支持，當中唔少帶埋家人。其中總理劉海航就帶同太太與外母一齊嚟撐場，做善事之餘又可以陪家人，配合主題又溫馨。另一總理王傲山更表示，佢每個星期都會陪爸爸一齊食飯，對衣著好講究嘅佢，嚟緊仲預備咗一份特別禮物畀爸爸，就係一套度身訂造嘅西裝！皆因為人父母總係將錢花晒落子女度，但往往唔捨得用喺自己身上，好多衫一着就好多年，所以佢今次就要幫爸爸添番套新裝。
卓妮見仁愛堂副主席李愛平喺版畫前欣賞，原來佢曾跟嶺南畫派大師趙少昂學畫畫，係趙大師嘅最後一批學生，後來師傅百年歸老，佢亦自覺天份一般，就冇再畫畫，但好鍾意欣賞同收藏唔同種類畫作，包括著名藝術家黃永玉作品。佢話家中小朋友對得啲收藏品多，無形間亦培養咗佢哋對藝術嘅興趣同靈感。
卓妮