政情：公民講場：加入「六四」拗到要死？

由多個親建制組織成立嘅「六四真相」爆出內訌疑雲，就究竟以個人或是團體名義加入「六四真相」嘅問題，愛港之聲召集人高達斌與正義聯盟召集人李偲嫣各執一詞。高達斌投訴李偲嫣因為「唔抵得」愛港之聲知名度高，所以處處針對佢。李偲嫣就嬲到尋日臨時召開記招同愛港之聲劃清界線，炮轟高達斌投訴佢打壓嘅言論失實，強調一開始就已經要求成員以團體名義加入，「我想問邊個打壓邊個？如果我講嘅嘢有半句錯，我不得好死！」正義聯盟正考慮循法律途徑向高達斌追究，睇嚟件事有排都未能真相大白。