選舉事務處對選舉開支申報有嚴格規定，立法會政制事務委員會尋日開會討論選舉舞弊及非法行為嘅規定同寬免安排，多位議員質疑選舉事務處連報少幾蚊都要交畀廉政公署立案調查，搞到佢哋次次喺選舉後都驚惹到周身蟻。
進出口界黃定光（象哥）話，佢喺○八年自動當選後，按規定要喺當選後三十日內提交選舉開支，但佢所屬嘅政黨好遲先搞造勢大會，搞到佢喺限期後先知道自己要負擔幾多開支，最後更加要向法庭提出選舉呈請修訂開支報告，前前後後使多成四萬幾蚊。
葉劉淑儀就批評，選舉事務處要求候選人將剩餘選舉收入捐畀慈善機構嘅安排，佢話選舉事務處要求佢哋喺短時間內將錢捐畀慈善機構，但有時候候選人根本冇咁快計到所有選舉開支，搞到有時捐錯錢。佢建議選舉事務處放寬規定，等佢哋唔使成日擔心因為報少幾蚊，而被廉署請飲咖啡喎。
政制及內地事務局副秘書長梁松泰解釋，現有法例容許當選人就輕微錯漏以行政方式及時修正，至於有議員建議當局延長申報時限，政府會繼續研究同聽取各界意見。