政情：阿松有金句：男人短命因畀女人激死
財政司前司長梁錦松自早前被傳參選下屆特首之後，漸趨高調，經常在公開活動現身，尋日又出席教育學院講座，大談青年人應該點去面對全球化衝擊。當講到面對世界一體化時，阿松就話科技發展可方便人類，但其實都有壞處，因為人嘅生命愈長，儲備就要預留更多，否則長命又冇錢會比死更難受喎。喺呢個時候，阿松突然話啲人成日問點解女人長命過男人？皆因男人經常被女人激死喎。莫非佢有感而發？
教院講talk似布道
阿松仲訓勉與會者，話依家人類仲要面對一人一票選舉，政府唔小心就會使晒未來錢，因為人嘅本性就係想攞多啲，畀少啲。不過，無論如何，做人最重要係「憑公義、好憐憫、存謙卑之心與神同行」，而且寧願為人無才有德，都唔好有才無德喎。阿松講咗個半鐘頭，就好似開緊布道大會咁，果然受洗後心中有神。至於佢心中有冇特首之位呢？佢就話冇計劃參選喎。不過，問佢係咪暫時冇呢個計劃，佢就冇答嘞。