政情：羅啟銳留美歲月 「一條腸食幾餐」
興趣可以當飯食？導演羅啟銳（Alex）就親身體驗過。尋日佢出席浸會大學全球華語大學生影視獎開幕禮時，憶述讀中學時成績麻麻，經常逃學去睇戲，一條亞皆老街就有五、六間戲院，入面夠靜夠黑實冇人搵到佢，睇睇吓就同電影結下不解之緣。Alex又分享自己留學美國讀電影嘅艱苦歲月，因為讀電影要使好多錢，佢被迫要一條香腸分幾餐食慳錢，原來為咗興趣真係連飯都可以食少啲。
Alex話，當年拍一條三分鐘嘅影片，已經要一百元美金，自己要貼好多錢買舊菲林完成拍攝工作，奈何家中冇錢，惟有四出兼職賺外快，圖書館、餐館、送貨等工作都做過。最惡劣時一條香腸仲要切開四、五粒，分幾餐食呀！不過，呢種生活令佢同唐人街嘅人混得好熟，拍片冇人會收佢「陀地」（保護費），反而隔籬小意大利區就有人收喇，但會明碼實價，仲着晒西裝幫佢喺拍片後清潔場地添！Alex話，依家拍攝數碼化，學生喺成本運用方面比以前靈活得多，拍攝手法亦比以前優勝，題材多元化，經常同社會議題掛鈎，令佢十分驚嘆同羨慕。