政情：貪曾白鴿遺臭萬年

開特別答問大會 全因貪曾

睇番天書第一部分，分咗六個章節，講番議事規則及其前身會議常規嘅演變、立法會憲制權力同組成、議員宣誓同申報利益、秘書處成立同支援議員、行政立法關係、以及立法會轄下委員會變革。當中有章節提及答問大會，其實係港英年代遺留下來嘅產物，到之後嘅特首就蕭規曹隨。天書話有需要時立法會可以舉行特別答問大會，而呢個「前無古人」之舉，就係由貪曾寫下史冊。

貪曾兩年前被東方報業集團踢爆「貪盡海陸空、歎盡省港澳」後，同年三月一日就應立法會內務委員會要求，出席特別答問大會，「就一連串圍繞他接受朋友款待及在深圳租用一個住宅單位的事件」答覆議員質詢。如果大家記得嘅話，當日貪曾扮晒可憐谷眼淚，可惜啲戲屎過「茄哩啡」，谷極都谷唔出眼淚，眼睛雪亮嘅市民自然睇得一清二楚。

阿甘炒女助理 調委會開齋

除咗答問大會外，立法會回歸後決定沿用以前立法局嘅委員會制度，只係唯一因應《基本法》而新增咗調查委員會，用作調查議員行為不檢，呢個委員會開齋之作，就係為咗○九年白鴿黨議員甘乃威涉嫌求愛不遂解僱女助理事件，最後委員會對佢表示「遺憾」。

另外，立法機關嘅決定涉及唔少金錢利益，早於一九二九年會議常規就列明，議員唔可以就有直接金錢利益事宜參與表決，九一年起更設立議員登記及申報個人利益嘅機制。及至○六年，立法會更決定議員個人利益監察委員會，需要考慮對申請發還工作開支及預支營運資金嘅投訴，但天書就寫得好隱晦，冇講咩原因要咁做。

不過，睇番資料就知道此舉係因為白鴿黨議員涂謹申喺○四年被揭發嘅「匯標事件」，當時佢用公帑租用自己同白鴿黨持有嘅「匯標公司」旗下物業作議員辦事處，因而被質疑變相用公帑資助佢供樓，更一度被要求辭職，所以後來先要修改規則堵塞漏洞。