政情：中環出更：波迷大輝 唔敢去巴西
好多立法會議員都係波友，非常重視四年一度嘅世界盃盛事。今年世界盃六月就殺到嚟，以往唔少議員都會放假飛去外地睇波，但今屆世界盃主辦國移師到南美巴西，加上巴西嘅治安出名差，連工業界議員林大輝呢位專業球迷，都話為安全起見，寧願睇電視直播捧愛隊好過喇。
一嚟治安差 二嚟「拉布」長
曾經做過本地波班主嘅大輝話，本來都幾有興趣去巴西睇波，但自從有唔少朋友話巴西治安唔係太好，連遊客接受緊電視台訪問時都被搶嘢時，大輝即刻打晒退堂鼓。不過，佢話最擔心唔係治安，而係立法會審議預算案「拉布」戰到六月都好可能未完結，作為議員又點可以因為睇波而走咗去呢？所以佢就寧願揀喺屋企睇波算數嘞。
雖然唔可以遠赴巴西睇波，但唔代表大輝唔緊張，佢上屆睇好西班牙，因為隊中有唔少至愛球星，但今屆佢就「移情別戀」轉捧巴西，事關巴西人強馬壯，又係主辦國，天時、地利、人和乜都有，點會唔贏呀。上屆大輝眼光好準，貼中西班牙捧盃，今次巴西隊有大輝「祝福」，唔知會否順利奪冠呢？
卓妮