政情：中環出更：啟剛雅宴 詩酒會友
復活節過後，派對仍一浪接一浪。香港青年聯會主席霍啟剛前晚就舉行別開生面嘅詩酒文化派對，搵來一班北京清華大學尖子，齊齊朗誦古代名詩，淺嘗中國白酒，似足古時嘅文人雅士。
以詩酒會友，係古代才子最佳嗜好，但時移世易，年輕人好少有呢番雅興。不過，英國牛津大學畢業嘅啟剛話，好嚮往中國詩詞歌賦中嘅意境，咁蹺青聯常董兼清華大學經管學院EMBA課程在讀生林淑怡（Mariana）都係愛好者，前晚約齊一眾EMBA校友及青聯成員，一邊唸詩，一邊嘗中國白酒，當中包括讀完法律又想讀EMBA嘅清華校友黃仰芳。
品中國白酒 吟才子名詩
青聯派出羅彥嵐、李瑩、盧琛及王冠等人，朗誦李白的《將進酒》、白居易《勸酒》及杜甫嘅《飲中八仙歌》，比賽無分勝負，純屬切磋。啟剛聽得津津有味，原來佢小學時曾參加英文朗誦比賽，可惜無緣問鼎獎項。佢至今仍渴望去清華讀書，EMBA當然係優選，希望學以致用，仲話等兒子大多幾歲，一定會加入清華學生之列。
晚宴搞手之一嘅Mariana近年鑽研白酒學問，不時向內地酒廠董事長偷師。佢話，咪以為飲西方紅酒先有文化，中國白酒一樣博大精深，單係種類都分為醬香型、濃香型等。清華經管學院香港校友會副會長陳進思（James）都拖埋成班校友撐場。James坦言，同學圈中不乏猛人及高官子弟，落堂後最愛把酒話家常，一次過聽晒中國大江南北風土民情，勝過行萬里路喎。
卓妮