政情：公民講場：朝令夕改 廢鑊又轉軚

外號「周一鑊」嘅平等機會委員會主席周一嶽，早前扮晒正義，高調批評嗰啲針對內地旅客嘅「驅蝗」行動，力促政府立法禁止針對同一種族內不同族群嘅歧視行為，平機會亦會展開相關研究及諮詢。事隔短短個多月，周一鑊尋日又喺電台改口話，類似歧視行為最近經已減少，若情況冇再惡化，就未必需要政府立法喎。周一鑊擔任食物及衞生局局長時，其治下嘅醫療、衞生同食物安全政策經常朝令夕改，搞到啲市民同相關業界無所適從，估唔到佢離開咗政府再「翻閹」出掌平機會後，呢鋪胡亂轉軚、瘋狂駕駛嘅癮都仍然戒唔甩！