政情：「六四真相」內訌 高達鬥偲嫣
今年係六四天安門事件廿五周年，多個親建制組織成立「六四真相」，本來諗住衝住支聯會而來，點知「出閘跣腳」。佢哋先係質疑支聯會誇大死傷數字，結果畀天安門母親批評佢哋褻瀆六四亡靈，發言人李顯聲尋日認衰，話要接受天安門母親對佢哋嘅批評咁話。
隔空互轟 各說各話
咁仲未夠，早前愛港之聲召集人高達斌聲稱以個人名義加入「六四真相」，估唔到「六四真相」聯席之一嘅正義聯盟召集人李偲嫣即刻將炮火對準佢，話唔會同愛港之聲一齊合作舉辦任何活動。
高達斌尋日坦言呢件事係「內部矛盾」，聲稱最初大家係用個人名義參與籌組，但係開記者會前兩日先改為用團體名義。佢仲話「某人」話要開批鬥大會，若有人對佢唔信任，會考慮退出咁話。
李偲嫣就反駁話，聯席一早決定係用團體形式組成，佢又澄清冇開批鬥大會，指責高達斌歪曲事實講大話。兩人各說各話，都唔知真相係乜。