政情：涉鹹網連結 「鈺」照證清白？
繼民主黨何俊仁被揭喺會議廳睇少女模特兒相後，連立法會主席曾鈺成都出事。話說前晚有網民眼利發現，曾鈺成嘅社交網站專頁突然分享一條疑似係色情短片嘅連結，即時令網民瘋傳。呢件事爆出後，曾鈺成一直未親身回應，尋日反而喺社交網站上載日本旅遊照，唔通佢想證明自己身在外地，唔關佢事？
社交網上載遊日相
曾鈺成嘅社交網站向來好「滯後」，例如佢早前去完上海，事隔兩日先將當地遊覽照片擺上網。但佢尋日即時擺咗五張喺京都賞櫻照片，力證自己唔喺香港。
不過互聯網呢家嘢，無分地域疆界喎，唔一定要人在香港先可以上網。
身在日本嘅曾鈺成回覆查詢時話，完全唔知發生咩事。前晚有助理同佢講，佢先知呢單嘢。曾鈺成強調好相信職員，今次絕對唔關職員事，估計係專頁太耐無轉密碼，被黑客闖入所致，佢已叫職員轉第二個密碼，防止事件再次發生。