政情：唔見美國會 民記怕醜？
外號「李漢奸」嘅民主黨創黨主席李柱銘夥拍「民主阿婆」前政務司司長陳方安生，早前完成美加「唱衰香港」之旅。港府不遲不早緊接邀請美國國會人員代表團訪問香港，仲搭好平台等佢哋同立法會議員會面，明眼人都諗到係想建制派幫手發表「唱好香港」言論，可惜民建聯（民記）等建制大戶集體失職冇影，全程只有紡織及製衣界議員鍾國斌（Felix）現身，莫非建制派自知英文水皮，費時現身講英文獻醜？
泛民僅三人報名 兩甩底
美國國會議員助理等一行七人尋日到訪立法會，就財經、旅遊等議題同議員交流意見，據知呢次會面只有四人報名參加，泛民方面有資訊科技界莫乃光（Charles）、會計界梁繼昌同民主黨涂謹申，建制唯一代表係Felix。然而報名係一回事，梁繼昌同涂謹申二人齊齊臨時缺席，最後剩番Charles同Felix撐足全場。
究竟Charles有冇趁機同美方代表「打小報告」？Charles澄清自己只係捱義氣代表泛民出席「娛賓」，期間先後向佢哋講解立法會組成、何謂功能組別同開會坐位分配後，已經差唔多夠鐘散會，最後僅僅夠時間介紹埋立會即將又有拉布戰上演。同場嘅Felix則自言席間已經警告咗美方唔好干預中國內政，不過有人私下話民建聯作為建制大戶有十多名議員，竟然無一個夠膽現身同美方代表同場辯論，認真抵打同講唔過去囉！
譚sir記者會避英文提問
講開又講，民建聯尋日公布政改方案，亦再次印證點解冇人敢於同美方代表溝通。話說民建聯中委會會議後公布二○一七年特首普選方案，建議提名委員會人數由一千二百至一千六百人組成，有意參選者獲得不少於十分一提委支持就可「入閘」，每名提委最多可選四名參選人，倘取得提委會過半數有效票及得票最高的二至四人，就可成為特首候選人。殊不知記者會舉行期間有人以英文提問，黨主席譚耀宗（譚sir）即時反應係等等先，答晒所有中文提問，最後先由黨副主席張國鈞以英文回答。由於張非立會議員，由此路進，就明晒點解冇人同美方代表溝通喇！