中環出更：梁家雙嬌為老字號獻新
只要有創意，傳統家庭用品都可以潮味十足。以生產塑膠家品聞名嘅本地老字號「紅A」，今年適逢成立六十五周年，接班嘅第三代梁慕蘭及梁馨蘭（Jessica）兩姊妹，同一班八、九十後設計團隊齊搞新意思，推出一系列顏色鮮艷嘅廚具家品。尋日首次亮相，新意及趣味十足。
「紅A」品牌喺香港幾乎無人唔識，但係經典設計如何迎接新時代，重任就落喺Jessica及家姐梁慕蘭身上。Jessica話，曾經有朋友向佢反映，婚後原本想用佢哋嘅產品，點知畀佢老公嫌老土。修讀過設計嘅Jessica於是決定為品牌改頭換面，用咗近八個月籌備成立新公司，目標係設計一物多用、外形新穎嘅家品系列，用家以年輕夫婦為主。
「轉換式筲箕」受歡迎
現場展示一個去水窿位可以調校大細嘅「轉換式筲箕」，就好受歡迎。香港貿發局製造業拓展總監周瑞（鹿生）（Ralph）仲一語雙關，盛讚話呢種篩選方式一定冇人反對喎！Ralph都係「紅A」用家，笑稱經歷過制水年代嘅佢，先可以深切體會到一個耐用嘅水桶係幾咁重要。佢又話傳統品牌想要延續發展，一定要研發高增值產品，好似歐洲品牌都歷史悠長，但係國際上就仲未有一個可以代表香港嘅塑膠品牌。佢認為「紅A」見證過去六十幾年本地發展，又堅持香港製造，好值得支持。
香港塑膠業廠商會主席孫榮聰（Eric）都有到場，佢話Jessica祖父「紅A」創辦人梁知行係該會創會主席，所以一定要嚟支持。Eric話，自己屋企都有好多「紅A」招牌膠櫈，平時疊埋一棟，每次一打通宵麻雀，就係呢啲櫈出動嘅時候喇！
卓妮