政情：指海洋公園票貴 阿Bill促起動物園
海洋公園入場門票貴已經唔係一件新鮮事，但唔知係咪復活節放假冇嘢做，勞工界立法會議員鄧家彪（Bill）尋日就發表一個有關動物園嘅調查，促請政府喺香港興建大型動物園，等家長同小朋友就算唔使去海洋公園，都有機會接觸更多動物喎。
「希望引入長頸鹿大象」
喺接受訪問嘅三千三百多份問卷中，九成二受訪小學生希望香港興建大型動物園，大部分都希望香港可以喺外地引入長頸鹿、大象、袋鼠等陸上動物。佢哋認為，現時主題公園門票格價太貴，兩成七受訪者覺得動物園應該要免費開放，三成六小朋友就認為票價一百元以內先算合理，暗示海洋公園應該大幅減價。
不過，即使海洋公園減票價，始終都係睇唔到長頸鹿、大象、袋鼠等陸上動物，所以阿Bill要求海洋公園減票價之餘，係咪應該主力要求政府興建一個具規模嘅動物園呢？話唔定到時可以將海洋公園嘅大熊貓搬屋到新建嘅動物園添！