政情：貪曾老點 中醫藥發展 枉交報告
「貪曾」前特首曾蔭權爵士禍港七年，中醫藥發展裹足不前，就連中文大學中醫中藥研究所臨床研究中心總監梁秉中，日前都狠批貪曾枉費佢研究中醫藥方面嘅心機。話說貪曾主政期間，時任中央政策組首席顧問劉兆佳曾邀請佢探討中醫藥發展前景，佢喺○八年就提交咗成吋厚嘅報告，建議當局興建日間中醫院，仲獻計完善中醫培訓。點知貪曾當報告冇到，梁秉中到依家重提件事時依然好有火：「用咗四十幾萬做研究，最終石沉大海！」
梁秉中多項建議石沉大海
其實貪曾喺梁秉中提交報告後翌年，曾提出推動優質產業發展，包括加強發展中醫藥業，但就唔係當初業界所建議嘅興建中醫院，當時梁秉中亦曾潑貪曾冷水話：「唔好再講發展中藥港，因為地產性質，同中藥發展係兩回事！」貪曾性格向來剛愎自用，當然話之你啦，唔係又點會發展到依家浸會大學為咗興建中醫教學學院，因而要爭奪九龍塘前李惠利工業學院笪地皮吖！
倡日間中醫院 唔使「過夜」
講到現屆政府擬籌建本港首間中醫院，梁秉中話，按佢觀察內地中醫院發展，「好多都變咗西醫院」，所以政府應該先為本港中醫院定位，例如可提供復康、老人病症等服務，又建議中醫院可做日間醫院，唔使畀病人「過夜」，否則按當局話循「中西醫結合」咁做，睇怕最終中醫都要受西醫牽制。
梁秉中又話，中醫顧及病人身體多方面問題，中醫院可提供復康治療、病毒感染病症、老人常見疾病及西醫難以治療嘅奇難雜症等，可做「純正中醫服務」，假如病人有緊急情況，可轉送其他醫院急症室。中醫院朝七晚十二運作，可讓病人長時間瞓喺床上做針灸、推拿等，醫師定期觀察情況，並與西醫互補不足。
其實現屆政府成立咗個中醫中藥發展委員會收集專家意見，但就唔見梁秉中有份。被問到有冇人邀請佢加入，佢又肯唔肯畀啲好主意政府？一頭白髮、年逾七十嘅梁秉中不置可否，仲自嘲話：「都聞到棺材香啦，有啲嘢唔使人哋提你。」梁秉中係元老級骨科教授，如果論資排輩，讀骨科出身嘅食物及衞生局局長高永文都要跟佢學嘢，唔知高永文會否學貪曾咁當前輩講嘢係耳邊風呢？