政情：中環出更：議員想趁拉布睇戲看書
立法會下周三將會開始審議議員就財政預算案提出嘅九百六十項修正案，雖然主席曾鈺成上周以瑣屑無聊為由率先剪走議員梁國雄（長毛）提出嘅九百零九項修正案，但仲有九百六十項修正案有待審議，未計議員可以不停發言「拉布」，淨係投票都投足幾十個鐘，簡直浪費青春。
不過，體育、演藝、文化及出版界議員馬逢國就自爆已經諗到好橋抗「拉布」，就係喺議事廳內睇戲。佢話過去有唔少電影想睇，但就一直因為事忙而未能成事，如今「拉布」起碼拉足大半個月，令佢有時間睇戲。佢又話，作為文化界議員，有責任要了解業界發展情況，唔擔心會被人質疑佢開會時睇戲。
議員陳恒鑌（Ben）就會趁「拉布」睇埋本睇咗好耐都未睇完嘅《群眾運動》一書，以及織埋去年拉布至今都未織得晒嘅頸巾，完成後會送贈畀女義工。保險界陳健波就決定化被動為主動，企起身批評「拉布」議員浪費議會時間，總之就唔畀對方好過。
疑分享色情網連結 曾鈺成「不知情」
不過，拉布戰未開始，立法會主席曾鈺成率先惹風波，他被發現疑於社交網站分享色情網站連結，有關連結經包括立法會議員「長毛」梁國雄等網民瘋傳後，有關連結隨即被刪除。曾鈺成透過發言人表示，他不在港，亦不知情，究竟是否黑客入侵，仍有待調查。
卓妮