政情：中環出更：沙圈花槽陣 保護嘉賓
沙田馬場嘅馬匹亮相圈（沙圈）內圍，尋日擺放咗一批新花槽，雖然美觀，但原來並唔係因為復活節而布置嘅裝飾，咁到底有咩用途呢？有馬主估計花槽可能係用來當分界線，等啲馬主同嘉賓影相時唔會愈行愈出，唔使驚嚇親啲馬咁話。不過，亦有馬主擔心，當馬匹行過時可能會唔小心踢到啲花槽喎！
經常入馬場嘅沙田區議會前主席韋國洪話，好多時帶啲親戚朋友入場，都鍾意影相留念，但啲馬匹其實對人類聲音同動作好敏感，而較少入馬場嘅人又唔知沙圈有條暗綠色分界線，有時大家背住啲馬匹影相，唔覺意行得太近，嚇到啲馬匹彈起腳踢親佢哋就唔好啦！
史立德曾憂馬匹踢到
作為馬主嘅史立德就擔心，有時啲馬匹行過時，如果唔小心踢到啲花槽就可能比較危險。不過，佢尋日帶親友入場捧愛駒時，都認同擺咗花槽之後，大家會意識到條界線，唔會行得太近啲馬匹，如果好似以前咁要職員提示大家行返去界線內，就唔係咁好喇。
卓妮問過馬會，佢哋話擺放呢啲花槽嘅真正原因，亦同大家估計一樣。事緣佢哋發現好多馬主同朋友都鍾意同馬匹影相，為咗避免人同馬匹有碰撞，最好就係擺啲花係度隔開，防患於未然喎。
卓妮同場見到馬會副主席葉錫安，平日好鍾意滑雪嘅佢，講起上周珠穆朗瑪峰嘅雪崩意外時，就話太太並唔擔心佢滑雪有危險，因為佢畏高所以唔會上雪山，只會去一般滑雪景點滑雪。
卓妮