政情：港鐵站恐嚇案 新民黨被撻朵
新民黨向來正正經經，但尋日我哋就收到讀者報料，話該黨主席葉劉淑儀私人助理嘅老公同港鐵職員爭論時，竟然撻新民黨個朵，最後涉嫌刑事恐嚇被捕，搞到葉太都要即刻同佢劃清界線。
報料嘅讀者話，該名私人助理嘅老公姓蕭，上星期三由內地返香港到達羅湖港鐵站票務大堂時，想調轉頭沿路返回內地，港鐵職員就緊係唔容許啦，蕭生於是吵吵鬧鬧，由下午搞到晚上七點鐘，除咗聲稱自己係新民黨成員，仲聲稱可以即刻炒（解僱）有關港鐵職員，又涉嫌恐嚇會打人，港鐵職員於是立刻報警，警方以涉嫌刑恐罪將佢拘捕。
葉劉稱與該黨無關
葉太話經調查後，證實佢嘅私人助理同老公都唔係新民黨員，強調事件同該黨冇關，不過經此一役，會警惕及向黨員發出指示，叫佢哋喺公眾場合，唔好動輒就撻新民黨個名出來，以及要為自己嘅行為負責。