外號「李漢奸」嘅民主黨創黨主席李柱銘早前聯同「民主阿婆」前政務司司長陳方安生，去咗美國同加拿大「唱衰香港」，又「叩見」美國副總統拜登，驚死老美唔介入香港內部事務，呢啲咁嘅行為，梗係被人鬧爆啦！
全國政協常委陳永棋尋日出席一個活動時，就狠批呢兩人勾結外國勢力，話兩人鍾意去邊度咪去邊度囉，但國家自己嘅事應該由自己做，唔應該要求外國去處理。
至於講到泛民主派立法會議員去上海同中央官員會面傾談政改嘅事，陳永棋就話，呢班人有啲一到埗就話要返轉頭，有啲就瞓一晚又趕返香港，開會都開得咁扭擰，根本就係喺度做騷囉！
佢仲話，如果泛民面對現實同中央溝通嘅話，唔單止喺上海可以傾政改，去到北京、南京等任何地方都可以傾，批評泛民根本就係井底蛙喎。