人稱「廢官」嘅前食物及衞生局局長周一嶽（周一鑊），自從獲「翻閹」做平等機會委員會主席之後，就開始呻窮，通常話啲人窮就會慳啲使，但周一鑊就邊呻窮，邊做大花筒。平機會尋日向立法會政制事務委員會提交嘅文件，就促請政府增加撥款，話現時辦事處租金高企，就算租平啲嘅地方，始終租金會增加，所以解決呢個問題嘅最好長遠辦法係有自己嘅永久辦事處喎，認真大想頭。
平機會有關文件仲話，辦事處嘅租金由○五年每平方呎二十二元，增加至一一年每平方呎四十二元，今年十二月將要續租，估計租金會再上升，屆時就會出現每年約四百萬元嘅不敷之數。又話咁多年來就算租金升，政府都冇為平機會提供專項額外補助，所以如果佢哋動用儲備嘅話，兩年左右會耗盡儲備喎。
不過，雖然平機會係咁呻窮，但文件仍然指出佢哋今年八月底會同多個機構舉辦國際研討會，邀請海外講員擔任講者。
其實周一鑊上場後，已傳出要重新招聘行政總裁一職，又曾要求政府為平機會購置永久辦公室，可惜被政府拒絕，同時被立法會議員及人權組織狠批浪費公帑。不過，該會現今又再游說立法會議員支持有關建議，唔知呢啲係應使則使，抑或係充大頭鬼呢？