政情：侍產假引發建制內訌
商界同勞工界立法會議員，自從當年最低工資一役後，甚少再次互相駁火，但預料嚟緊勞資雙方好快再有大戰，講緊嘅係立法會《2014年僱傭（修訂）條例草案》，呢條例亦係審議男士侍產假嘅法例。話說有關條例草案委員會尋日舉行首次會議，並選舉委員會主席，點知工聯會黃國健以一票之差輸畀會計界梁繼昌，據聞除咗民建聯（民記）有兩個議員缺席外，自由黨投票亦企咗喺梁繼昌嗰邊，睇嚟今次唔單止係勞資問題，仲涉及政黨之間嘅恩怨。
黃國健輸畀「兩支槍」
由於勞工界同商界議員一早知道呢條男士侍產假法例係兵家必爭之地，所以雙方都一早「吹雞」叫大量黨友加入委員會，務求奪得委員會主席一職，以擴大本身陣營聲勢。尋日會議共有十八名議員報名出席，建制派佔十二人，理應有絕對優勢，但點知黃國健出選主席時，竟然遭遇滑鐵盧以七票比八票飲恨，輸咗畀泛民主派梁繼昌。
我哋經過追查之後，發現原來十八名報咗名開會嘅議員，最終得十五個議員投票，其中兩名冇投票嘅議員包括民記葛珮帆同蔣麗芸，而佢哋亦係民記喺委員會內唯一兩名代表，兩人都唔現身投票，似乎唔係咁簡單，唔通連佢哋都唔撐工聯會議員做主席？
疑向泛民賣順水人情
不過，就算民記兩人唔現身，其實建制派都夠贏泛民，但可惜呢個侍產假議題，早已預視為勞工界同商界議員之爭，所以紡織及製衣界鍾國斌同飲食界張宇人兩名自由黨議員就成為關鍵票數，兩人齊齊投票畀梁繼昌，令黃國健失落主席寶座。據了解，自由黨認為侍產假呢個議題，無可能企喺打工仔立場，所以唔可以畀工聯會議員做主席，況且泛民派出比較溫和嘅梁繼昌爭主席，所以該黨寧願放棄建制派身份，都要「倒戈」支持梁繼昌。
不過，亦有人分析指，委員會主席無論係邊一個陣營做，其實對法案審議進度唔會有太大影響，所以尋日嘅投票結果，只能反映自由黨有意賣過順水人情畀溫和泛民，至於背後有咩目的，相信好快會浮出水面。