中環出更：鄉議局多甩「漏」被追差餉
新界鄉議局自從搬咗去沙田石門新局址之後，就飽經風雨，落成冇耐就漏水，又要重鋪大樓內大劇院嘅地板，之後又因為電力裝置唔合符法例規定，要再畀錢重新安裝，總之頻頻執漏啦。不過，尋日鄉議局執委會終於冇再喺議程上提到要科水維修喇，但點知有執委發現，原來局方一直都捱緊貴地租，仲要一次過被政府追番百幾萬元差餉添，原來又係因為人為甩漏。
疑無申豁免
話說鄉議局執委薛浩然喺會議即將結束時，突然好精靈咁話留意到局方上期畀咗百幾萬元地租差餉，點解最近又要再畀一百六十多萬元差餉喎，因為鄉議局屬於「政府、機構或社區」用地，故應該獲豁免差餉先啱。唔知係咪一言驚醒夢中人，大家跟住就紛紛議論，有執委話，其實早前已同民政事務局局長曾德成傾過呢件事，局長話會跟進喎。
有執委就話，其實鄉議局交緊每季十幾萬元差餉，呢百幾萬元係政府追收番以前嘅費用。咁係咪有人漏咗向政府申請豁免差餉？最後喺大家都唔係太知發生緊咩事嘅情況下，決議由總務委員會跟進，同政府傾吓係咪有豁免鄉議局大樓地租及差餉嘅事。
卓妮