中環出更：新臉孔舊人 博愛做善事
博愛醫院新一屆董事局尋日正式履新，由新任主席何榮添接棒，今屆董事局有好多新臉孔，亦有唔少「回巢」總理，包括趙瑤及廖齡儀等靚女。卓妮見到香港能源礦產聯合會會長殷劍波特地來支持太太林群就職總理，殷劍波話，嚟緊佢會投放資源喺中港兩地搞慈善公益事業，一於同太太齊齊做善事。
殷劍波話，能源礦產聯合會內有一班熱心嘅優秀企業家，一向熱心捐助養老院、孤兒院，亦不時到內地山區修路建橋，下一步將喺會內成立一個部門，全力推動慈善事業。其中喺香港方面，將集中幫助弱勢群體嘅兒童、青少年及貧困家庭，預計近兩個月將有大型活動。殷劍波本身從事礦業，佢太太林群話平時都會喺公司幫手，忙過不停。
博愛醫院副總幹事吳凱孚話，最近院方喺天水圍成立一個青少年中心，內設一間自負盈虧嘅社企咖啡室，佢哋將會提供區內青年職業技能培訓，例如咖啡師等。負責項目嘅係今屆升呢做副主席嘅簡陳擷霞，簡太話，呢間社企啱啱投入服務，期望可以為天水圍區嘅青少年，帶來更全面嘅社會服務，締造和諧美好的社區環境。
何榮添接棒做主席
新主席何榮添話，上任後重點工作之一，係全力跟進屯門藍地十萬平方呎土地興建全港最大型安老院舍一事，目前院方正與安老事務委員會等多個政府部門密切磋商，計劃提供一條龍長者安老服務。今屆董事局新丁總理仲有位靚女李淑媛，卓妮見佢同博愛前主席潘德明囝囝潘治忠好好傾，兩人都做金融業，難怪有咁多話題喇！
卓妮