政情：行會出席率近九成 好過立會
特首辦常任秘書長處劉焱早前出席立法會特別財委會時，以沒有統計資料為由，拒絕披露十四名行政會議非官守成員嘅出席率，換來嘅結果當然係畀班泛民議員鬧爆。特首辦尋日終於以書面方式補充有關資料，發現其實絕大部分行會成員嘅出席率都有超過或接近九成，好過好多立法會議員，唔明政府點解當初死都唔肯公布。
李國章缺席多可原諒
唯一一名出席率真係較低嘅，係前教育統籌局局長李國章，過去一年半舉行過嘅七十九次行會，佢一共缺席咗三十一次，出席率僅有六成一。不過眾所周知，李國章早前成日缺席行會，主因係要照顧患咗重病嘅妻子，當時佢有依足程序向特首請假，並喺休假期間自願暫停支取行會成員酬金，冇呃納稅人一分一毫，唔似某啲議員咁，成日遲到早退唔開會都照出糧。佢太太不幸過身後，李國章亦好快重投行會工作，積極開會。